Andes

Dros y misoedd yn arwain at Eisteddfod Genedlaethol Caerdydd 2008 buon ni yma yn Ysgol Gymraeg yr Andes yn cydweithio ar brosiect aml gyfrwng gyda’r Ganolfan Dysgu Cymraeg i Oedolion, Caerdydd a Bro Morgannwg a’r Eisteddfod Genedlaethol i greu arddangosfa ar gyfer Maes D. Danfonon ni luniau a phytiau o wybodaeth am ein hardal, darnau o waith gan y rai sy’n dysgu Cymraeg yma yn y ddwy ysgol, (Esquel a Threvelin), recordiadau llais a ffilmiau cylch hen a chyfoes am y Wladfa. Roedd dysgwyr Canolfan Caerdydd wedi cyfrannu pethau tebyg o’u hardal nhw.

Wrth gwrs rydyn ni wedi cael amser cyffrous yn ddiweddar yma yn ardal Godre’r Andes, gyda thân mawr ar y mynyddoedd rhwng Esquel a Threvelin a dau ffrwydrad folcanig. Roedd lluniau bendigedig a dynnwyd gan bobl leol o’r digwyddiadau hynny ymhlith lluniau’r arddangosfa. Fe welwch chi fwy o luniau o’r argyfwng yn yr erthygl ‘ Argyfwng! Chaitèn yn ffrwydro o’r newydd.’

Wrth gwrs, dydy pethau ddim mor ddramatig yma trwy’r amser, felly fe ddanfonon ni hefyd luniau o fywyd bob dydd - cymdeithasu, bwyta, byd natur a ffermio - i roi darlun mwy cytbwys!.

Rhan arall o’r prosiect oedd cysylltiad camera gwe rhwng y Ganolfan yn Esquel a Phabell y Dysgwyr (Maes D). Ar ddydd Mercher, 6ed o Awst, am 10yb (2.00yp yng Nghymru) fe gawson ni siarad â’r rhai a oedd yn mynychu’r Cwrs Haf yng Nghaerdydd ar y pryd, a hefyd rhai o’n hardal ni a oedd yn ymweld â’r Maes y diwrnod hwnnw a aeth draw i Faes D er mwyn cael sgwrs â ni. Roedd yn braf iawn cael siarad â nhw i gyd.

Rydyn ni’n gobeithio’n fawr fod pobl Cymru wedi mwynhau gweld ein lluniau, clywed ein lleisiau a darllen amdanon ni. Rydyn ni nawr yn edrych ymlaen yn arw at dderbyn yr arddangosfa yma yn y Wladfa’n fuan. Fe fydd hi’n mynd i’r Eisteddfod yn Nhrelew (y Gaiman) ac wedyn yn dod yn ôl yma i Drevelin ac Esquel yn yr Andes i fod yn arddangosfa tymor hir.

Gill Stephen

Tiwtor

Ysgol Gymraeg yr Andes

Rivadavia 1065

Esquel 9200

Chubut

Patagonia