Mae Canolfan Cymraeg i Oedolion Gogledd Cymru wrthi’n ystyried rhinweddau cyrsiau modiwlar ar gyfer y dyfodol. Ond beth yn union yw cyrsiau modiwlar?
Yn fras, yr hyn sydd dan sylw yw cyrsiau mewn blociau o 10 wythnos. Byddai’r Cwrs Mynediad fel enghraifft, yn medru cael ei drefnu fel a ganlyn:
• 20 awr cyswllt ymhob bloc
• 6 bloc er mwyn cwblhau’r lefel
• Un bloc bob tymor am ddwy flynedd
• Eu disgrifio fel Mynediad 1 i Mynediad 6.
Beth felly ydy’r manteision o wneud hyn? Wel, gall fod nifer o fanteision, gan gynnwys:
• mae’n ymateb i ofynion dysgwyr sydd eisiau’r opsiwn o gwrs byr
• y posibilrwydd o roi dilyniant modiwlau er mwyn cynnig cyrsiau mwy ‘traddodiadol’
• sicrhau cyfraddau cwblhau gwell
• mwy o foddhad ymysg dysgwyr (o gyflawni/cwblhau mewn cyfnod byr)
• ein galluogi ni i gymharu data yn fwy effeithiol
• gellid rhoi tystysgrif ‘fewnol’ i’r dysgwyr ar ddiwedd y tymor i gydnabod llwyddiant
• mae’n ymateb i gais gan Estyn i ni ystyried hyn
• mae’n hwyluso sefyllfa lle mae dymuniad i ddechrau cwrs ar unrhyw adeg o’r flwyddyn
• o roi’r 3 modiwl cyntaf at ei gilydd, byddai’n dal i gyfateb i Mynediad 1 ar gyfer y rheiny sydd eisiau cwrs hwy, mwy traddodiadol
Ar y llaw arall, mae’n anorfod fod yna anfanteision hefyd, megis:
• mae’n ei gwneud hi’n haws i ddysgwyr adael cyn cyrraedd rhuglder
• colli dysgwyr fesul modiwl sy’n golygu efallai na fydd modiwlau uwch yn hyfyw
• nod cymhwyster arholiad – efallai yn broblem i’w gymhwyso?
• yr angen i sicrhau bod credydau RhCA wedi eu rhannu’n gyfartal i bob modiwl
• mwy o waith papur i’r tiwtor e.e. ymrestru, cynllun dysgu unigol tymhorol
• cyfraddau dilyniant cymharol isel (dysgwyr wedi cyflawni’r hyn yr oeddynt ei eisiau mewn 10 neu 20 wythnos)
Beth ydy’ch barn chi am hyn? Os oes gennych chi sylwadau ar y syniad hwn, neu ddadleuon ychwanegol o blaid neu yn erbyn, yna byddai Canolfan y Gogledd yn falch iawn o glywed gennych chi. Anfonwch e-bost i’r cyfeiriad canlynol os gwelwch chi’n dda: i.gruffydd@bangor.ac.uk
Ifor Gruffydd
Cyfarwyddwr Canolfan CiO Gogledd Cymru
