Mae gan bob un o’r canolfannau iaith eu heriau, wrth gwrs, ond mae’r heriau sy’n wynebu Canolfan Gwent ychydig yn wahanol gan ei bod yn gwasanaethu pum sir: Blaenau Gwent, Casnewydd, Caerffili, Torfaen a Mynwy. Ardal boblog, enfawr. Mae’r ganolfan yn rhan o Goleg Gwent ac yn cydweithio â Choleg Ystrad Mynach i ddarparu’r holl ddosbarthiadau Cymraeg. Ar hyn o bryd, mae’r ganolfan wedi ymgartrefu ar Gampws yr Hill, y Fenni.
Mae 13 o staff llawn amser yn gweithio yno yn ogystal â 75 o diwtoriaid. Mae’r tiwtoriaid hynny yn cynnwys trawsdoriad o Gymry Cymraeg a dysgwyr, gyda thri chwarter ohonynt yn gyn-ddysgwyr. Geraint Wilson-Price sy’n cyfarwyddo gwaith y ganolfan ac mae hynny’n dipyn o gamp o gofio bod gan y ganolfan 5 swyddog datblygu – un ymhob awdurdod sirol. Mae’r swyddogion datblygu hefyd yn dysgu dosbarthiadau ac yn trefnu sesiynau dysgu anffurfiol. Staff profiadol, brwdfrydig ac yn eu plith y mae Siân Griffiths, y rheolwr gweithredol, sydd hefyd yn cynnal dosbarthiadau. Yn ddiweddar, cafodd y ganolfan arolwg lwyddiannus gan Estyn a darllenwch Ddyddiadur Arolwg Siân (Adran Newyddion) er mwyn cael gwybod sut mae mynd ati i oroesi arlowg!
Cyfathrebu’n hwylus â phawb yw’r prif nod mewn canolfan mor fawr, mae’n siwr, ac er mwyn gwneud hynny mae Canolfan Gwent yn gwneud defnydd llawn o Moodle, sef rhyw fath o fewnrwyd sy’n cynnwys pob math o wybodaeth yn ymwneud ag adnoddau a chyrsiau. Gall y staff a’r tiwtoriaid gyrchu’r safle ar unrhyw adeg gan ddefnyddio cyfrin air. Hefyd, cynhelir y Cwrs Cymhwyster i diwtoriaid ac mae saith o diwtoriaid wedi ymrwymo i’r cwrs hwnnw hyd yn hyn. Ond hoffai’r ganolfan ddenu mwy o diwtoriaid yn gyffredinol a chynigir sesiynau hyfforddi addas a bywiog.
Y cyrsiau preswyl yw rhai o’r cyrsiau mwyaf poblogaidd o hyd, gyda Llanbedr Pont Steffan ar frig y rhestr o leoliadau poblogaidd! Mae’r ganolfan yn teimlo bod rhaid dyfalbarhau i sbarduno’r dysgwyr a’r ffordd orau o wneud hynny yw wrth gadw mewn cysylltiad rheolaidd a chynnig gwybodaeth ddefnyddiol ac amserol. Dosberthir pecynnau a chylchgrawn tymhorol at y perwyl hwnnw ac maen nhw hefyd yn cynnwys gwybodaeth am gyrsiau penwythnos a chyrsiau undydd. Mae’r ganolfan hefyd yn cydweithio’n agos â Menter Iaith Caerffili a Menter Iaith Blaenau Gwent, Torfaen a Mynwy. Yn sicr, o ganlyniad i waith y Ganolfan a’r sefydliadau eraill, mae patrwm iaith yr ardal yn raddol newid ac mae ymweliad â’r swyddfa weithgar ar Gampws yr Hill yn ysbrydoliaeth ynddo’i hun.
