Bob blwyddyn yn yr Eisteddfod Genedlaethol rhoddir gwobr i rywun sydd wedi gwneud cyfraniad mawr i faes Cymraeg i Oedolion. Rhoddir y tlws a’r wobr ariannol gan Havard a Rhiannon Gregory, er cof am Elvet a Mair Elvet Thomas a wnaeth gymaint o gyfraniad i faes dysgu’r Gymraeg fel ail iaith. Teimla Havard a Rhiannon fod tiwtoriaid Cymraeg yn gwneud gwaith amhrisiadwy nad yw bob amser yn cael ei gydnabod. Maent yn rhoi tlws hardd dros ben ynghyd â gwobr ariannol deilwng iawn.
Mae nifer o diwtoriaid wedi derbyn y tlws erbyn hyn, fel y gwelir isod:
2000 – y diweddar Chris Rees
2001 – Basil Davies
2002 – Felicity Roberts
2003 – er cof am Robina Elis Gruffydd
2004 – Geraint Wilson-Price
2005 – Elwyn Hughes
2006 – Keith Rogers ac Elwyn Havard
2007 – Eirian Conlon
2008 – Cennard Davies
Caiff y tiwtoriaid eu hanrhydeddu am roi gwasanaeth gwerthfawr i faes Cymraeg i Oedolion a mawr yw ein diolch i Cennard Davies am ddod â’r tlws i’r gynhadledd genedlaethol i diwtoriaid eleni fel bod tiwtoriaid o bob cwr o Gymru yn cael cyfle i weld y trysor hwn.
Mae’r wobr wedi ei hen sefydlu felly ond fe fydd yna ychydig o newid i’r drefn bresennol wrth baratoi ar gyfer y blynyddoedd sydd i ddod. Pwyllgor golygyddol y Tiwtor fydd yn gyfrifol am weinyddu’r Tlws Coffa o’r flwyddyn nesaf ymlaen. Mae hynny’n golygu y bydd modd gwneud enwebiadau ar-lein a gellir eu hanfon at y pwyllgor golygyddol gan ddefnyddio’r ffurflen bwrpasol yn yr adran gysylltu o fis Mai 2009 ymlaen. Y pwyllgor hwnnw hefyd fydd yn dewis yr enillydd. Cofiwch ddarllen Rhifyn 4 (Chwefror 2009) am fwy o fanylion.
