Newyddion Canolfan Morgannwg
Anrheg Nadolig i’r tiwtoriaid
Gobeithio na fydd y tiwtoriaid yn rhy siomedig ein bod yn datgelu beth yw eu hanrheg cyn iddyn nhw eu hagor. Dros y misoedd diwethaf, mae nifer o diwtoriaid y Ganolfan wedi bod yn cyfrannu gweithgareddau sydd wedi’u paratoi ar gyfer eu defnyddio ar gyfrifiadur yn ystod gwers. Maen nhw wedi cael eu didoli a’u golygu a gobeithir gallu cyflwyno cof bach yn llawn gweithgareddau i’r tiwtoriaid fel anrheg Nadolig.
Cwrs ar gyfer cynorthwywyr sylfaen
O fewn yr wythnosau nesaf, bydd deunyddiau’n cael eu dosbarthu’n rhad ac am ddim i bob canolfan ar gyfer eu defnyddio gyda chynorthwywyr dosbarth yn y sector Gymraeg. Cynhaliwyd dau gwrs peilot 30 awr y llynedd a chanlyniad y peilot yw llyfryn sy’n canolbwyntio ar feithrin cywirdeb o fewn patrymau elfennol, a cheir CD sain i gyd-fynd ag ef.
Partneriaethau Addysg Gymunedol
Mae swyddogion y Ganolfan yn treulio cryn dipyn o amser yn cefnogi gweithgareddau dysgu oedolion yn y gymuned. Gall hyn fod yn ffordd effeithiol iawn o rwydweithio a dod i wybod am ddatblygiadau yn y maes. Yn ddiweddar, buom yn ddigon ffodus i gael nawdd gan y bartneriaeth ym Mhen-y-bont ar Ogwr i brynu baneri cyhoeddusrwydd, argraffu copïau lliwgar o’r digwyddiadau cymdeithasol, a chael set o lyfrau darllen ar gyfer un o’r Clybiau Darllen. Mae’n bwysig bod y maes yn manteisio ar y nawdd hwn.
Dysgu Anffurfiol
Mae croeso mawr i ddysgwyr o ganolfannau cyfagos ymuno â dysgwyr Morgannwg ar gyfer gweithgareddau dysgu anffurfiol. Beth am ddod â chriw i un o’r teithiau cerdded – ail Sadwrn bob mis am 10.30 y bore.
Mae nifer o weithgareddau’n cael eu trefnu bob wythnos ond dyma rai o’r prif ddigwyddiadau dros yr wythnosau nesaf:
- Bore Hwyl i’r Teulu yng Nghanolfan Hamdden Merthyr. Un o flaenoriaethau strategol addysg oedolion ym Merthyr yw byw yn iach ac felly bydd y bore yn dilyn y thema honno – bwyta’n iach a chadw’n heini i blant. Dewch draw erbyn 11.30, ddydd Sadwrn 28 Tachwedd.
- Gwasnaeth Carolau ar ddydd Mercher, 9 Rhagfyr yng Nghapel Salem, Tonteg.
- Cyfres o giniawau Nadolig gyda’r siaradwraig wadd, Eleri Siôn.
Am fanylion llawn ar y rhaglen dysgu anffurfiol, cysylltwch â Shan Morgan ar smorgan2@glam.ac.uk.
Cwrs Nadolig
Yn dilyn llwyddiant ein cwrs Nadolig cyntaf y llynedd, cynhelir cwrs arall eleni – 14 + 15 Rhagfyr yng Nghanolfan Dysgu Gydol Oes Gartholwg. Un o’r grwpiau fydd grŵp adolygu arbennig ar gyfer y dysgwyr hynny fydd yn sefyll arholiad Mynediad ym mis Ionawr. Croeso mawr i ddysgwyr o ganolfannau cyfagos.
