gwent 3

Mae gweithwyr o Ganolfan Cymraeg i Oedolion Gwent yn gobeithio ymestyn y defnydd a wneir o e-ddysgu yn y ddarpariaeth a gynigir gan y ganolfan.

Cafodd aelodau o staff y Ganolfan gyfle i fynychu diwrnod hyfforddiant a drefnwyd gan APADGOS yng Nghaerdydd. Dysgodd Jacqui Spiller, Catrin Thomas, Glenda Brown, Nigel Ruddock a Steffan Webb lawer yn ystod y diwrnod a gynhaliwyd yng Ngwesty Mecure Holland House.

    Roedd y sesiynau yn cynnwys cyflwyniad i e-ddysgu, adolygiad o’r cwrs cyfunol a gynigir gan Ganolfan Cymraeg i Oedolion Caerdydd a Bro Morgannwg, adolygu’r adnoddau dysgu ar-lein sydd ar gael yn ogystal â gweithdai i ystyried sut y gellir datblygu’r ddarpariaeth ymhellach.

    Yn ôl Steffan Webb, roedd yn ddiwrnod da iawn. "Roedd y deunydd yn bendant yn eich ysgogi ac mae hynny’n cynnig her i’r ganolfan a’r holl diwtoriaid i groesawu technolegau newydd wrth ddysgu a pharatoi.

    Mae grwpiau bychain o diwtoriaid eisoes wedi cael hyfforddiant ar gyfer defnyddio byrddau gwyn rhyngweithiol ac rydyn ni’n gobeithio y byddwn yn gallu ehangu’n darpariaeth yn y dyfodol i gynnwys mwy o fyrddau gwyn rhyngweithiol a chyfleusterau labordai iaith.”

    Os oes gan diwtoriaid Cymraeg i Oedolion gyfleusterau yn eu hystafelloedd ar hyn o bryd nad ydynt yn gallu eu defnyddio, byddwn yn ddiolchgar pe baent yn cysylltu â mi yn syth ar 01495 333735.

Steffan Webb

Rheolwr Hyfforddiant

Ym mis Gorffennaf 2008, fel rhan o Wobrau Dathlu Rhagoriaeth Coleg Gwent enillodd Canolfan Cymraeg i Oedolion Gwent Wobr y Prifathro 2008.

Enillwyd y wobr hon gan y ganolfan am fod yr adran orau yn y coleg am ganlyniadau achredu a pherfformiad cyffredinol yn ystod 2007/08.

Llongyfarchiadau mawr iawn i’r ganolfan a’r staff am eu llwyddiant, sy’n profi unwaith yn rhagor fod y maes Cymraeg i Oedolion yn mynd o nerth i nerth.