Y wobr yn y rhifyn diwethaf oedd pâr o docynnau maes ar gyfer yr Eisteddfod Genedlaethol eleni, o 31 Gorffennaf i 7 Awst, ac mae’r wobr yn rhoddedig gan swyddfa’r Eisteddfod.
Mae’r adeg hon o’r flwyddyn, yn draddodiadol, yn gyfnod prysur iawn wrth i ddysgwyr ar hyd a lled y wlad ddechrau paratoi ar gyfer yr Eisteddfod Genedlaethol. Mae cystadlaethau perfformio a chystadlaethau ysgrifenedig i bobl sy'n dysgu Cymraeg.
Ceir cystadlaethau ysgrifennu barddoniaeth, rhyddiaith a hyd yn oed blog! Dewch draw i babell y dysgwyr, sef Maes D, i weld pwy sydd wedi cyrraedd y brig. Am fanylion pellach am yr holl gystadlaethau i ddysgwyr, edrychwch ar y Rhestr Testunau neu cysylltwch â Jo Knell, sef Swyddog y Dysgwyr, jo@eisteddfod.org.uk
Y cwestiwn oedd:
Ble bydd Eisteddfod Genedlaethol 2010 yn cael ei chynnal?
Yr ateb wrth gwrs yw mai yng Nglyn Ebwy y cynhelir Eisteddfod Blaenau Gwent a Blaenau’r Cymoedd, a’r enillydd yw Philippa Gibson o Bontgarreg. Llongyfarchiadau mawr i chi a mwynhewch yr Eisteddfod!
Lleolir siop Trysordy Cymru yn Aberaeron, Ceredigion. Mae’r perchennog, Jenny Hicks, yn adnabod yr ardal a’i chwsmeriaid yn dda, ac wedi gweld yr angen am gyflenwad chwaethus a lliwgar o bob math o emwaith ac ar gyfer pob oedran.
Gyda hithau wedi dysgu Cymraeg, mae cynnig gemwaith Cymreig yn bwysig iddi ac fe welir hynny yn y dewis eang sydd ganddi o nwyddau Clogau, Carrie Elspeth a Ronin. Ar y silffoedd hefyd gwelir gemwaith y cwmni ‘Cymru Gold,’ yn ogystal â gwydr sydd wedi ei baentio â llaw yng Nghymru.
Mae’r siop fel ogof yn llawn dirgelwch, gydag un silff fawr yn gwegian dan bwysau casgliad trawiadol o emwaith ambr. Gwelir darnau hardd gan Kit Heath yn hawlio’u lle ar silff arall.
Mae’r dylanwad Celtaidd i’w weld yn amlwg yn y siop ac mae nwyddau arian y cwmni o’r Alban, Ortak, yn boblogaidd iawn.
Ceir yma ddigonedd o ddewis ar gyfer plant hefyd, o fwclisau pren pert i glociau wal lliwgar.
Siop y Trysordy sydd yn noddi’r gystadleuaeth y tro hwn a mawr yw ein diolch i Jenny Hicks. Y wobr yw tocyn anrheg gwerth £20, a pheidiwch â phoeni os na allwch ddod i’r siop i wario’r tocyn gan fod Y Trysordy hefyd yn cynnig gwasanaeth postio!
Gan ein bod yn ymlwybro ar hyd strydoedd Aberaeron, y cwestiwn yw:
Ble cafodd Eisteddfod Genedlaethol yr Urdd 2010 ei chynnal?
